(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងសារពិសេស និងបន្ទាន់មកបញ្ជាក់ថា ប្រតិបត្តិការចាក់វ៉ាក់សាំងជូនប្រជាពលរដ្ឋនៅក្នុងតំបន់ក្រហម ដែលជាតំបន់ប្រឈមការរីករាលដាលជំងឺកូវីដ១៩នោះ គឺចាក់រហូតអស់ប្រជាពលរដ្ឋ បើចាក់មិនអស់ គឺមិនដកថយជាដាច់ខាត។

នៅក្នុងសារពិសេសសនិងបន្ទាន់ម្តេចតេជោ ហ៊ុន សែន បានថ្លែងយ៉ាងដូច្នេះ «ខ្ញុំស្នើសុំសម្តេចពិជ័យសេនាបញ្ជាទៅអង្គភាព ដែលត្រូវចុះចាក់នៅក្នុងតំបន់ក្រហម គឺមិនត្រូវបញ្ចប់ត្រឹមដូសទី១ នៅថ្ងៃទី១៥ ខែឧសភា នៅទេ ដូសទី១ គឺត្រូវធ្វើយ៉ាងណាឱ្យអស់ប្រជាពលរដ្ឋនៅក្នុងតំបន់ក្រហម មិនថាត្រឹម៥២ម៉ឺននាក់ទេ ទៅ៥៣ ៥៤ ៥៥ម៉ឺននាក់ ក៏យើងនៅតែមានលទ្ធភាពចាក់ជូនប្រជាពលរដ្ឋ។ ក៏ប៉ុន្តែយើងក៏សូមអង្វរ-កប្រជាពលរដ្ឋកុំឱ្យចេញពីតំបន់ផ្សេងចូលមកតំបន់ក្រហម ដើម្បីបានវ៉ាក់សាំង។ អ៊ីចឹងទេ សូមដំណើរការចាក់តាមធម្មតា ហើយចាក់រួចដូសទី១ហើយ បន្តការចាក់ដូសទី២»។

សម្តេចតេជោ បានថ្លែងបន្តថា «តំបន់ក្រហមជាតំបន់មានហានិភ័យខ្ពស់ប្រជាពលរដ្ឋត្រូវបានខ្ទប់នៅទីនោះ។ ពួកគាត់លំបាកណាស់ទៅហើយ ដូច្នេះពួកយើងត្រូវឱ្យគាត់ទទួលបានផលប្រយោជន៍មុនគេ ដើម្បីពួកគាត់អាចនឹងបន្តស្ថិតនៅតំបន់ក្រហម ដែលអាចចាត់ទុកជាតំបន់បិទខ្ទប់បន្តទៀតដោយអាជ្ញាធររាជធានីភ្នំពេញ»។

សូមជម្រាបជូនថា ក្នុងសារសំឡេងនេះ សម្តេចតេជោ ហ៊ុន សែន បានណែនាំទៅក្រុមការងារចាក់វ៉ាក់សាំង ឱ្យបន្តរៀបចំក្រុមគ្រូពេទ្យ ដើម្បីចាក់វ៉ាក់សាំងនៅតំបន់ក្រហមមួយសង្កាត់ទៀត ដែលមិនទាន់ចាក់នៅឡើយ។ បើតាមសម្តេចពេលវ៉ាក់សាំងមកដល់នៅថ្ងៃទី១១ ខែឧសភា គឺរៀបចំចាក់នៅតំបន់ក្រហម ដែលមិនទាន់ចាក់នោះតែម្តង។

សម្តេចតេជោ ហ៊ុន សែន ក៏បានថ្លែងកោតសរសើរដល់ថ្នាក់ដឹកនាំ និងកងទ័ពមកពីបណ្តាកងពលនានា និងក្រុមគ្រូពេទ្យនៃកងយោធពលខេមរភូមិន្ទ ដែលបានចូលទៅជួយប្រជាពលរដ្ឋនៅតំបន់ក្រហមដោយមិនមានការភ័យខ្លាច ឬបារម្ភពីគ្រោះថ្នាក់។ សម្តេចតេជោ ក៏បានអរគុណសម្រាប់ការជួយយកជំនួយរបស់សម្តេចទៅចែកជូនប្រជាពលរដ្ឋនៅតំបន់នោះ៕
សារពិសេសសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បញ្ជាអោយចាក់វ៉ាក់សាំងកូវីដ១៩ ជូនប្រជាពលរដ្ឋដែលរស់នៅ «តំបន់ក្រហម» អោយបានគ្រប់ៗគ្នា ហើយវ៉ាក់សាំងនឹងបន្តមកដល់កម្ពុជាចំនួន១លានដូសថែមទៀត នៅក្នុងខែឧសភានេះ។ សូមស្ដាប់សារពិសេស និងបន្ទាន់របស់សម្ដេចតេជោ នៅខាងក្រោម៖

https://www.facebook.com/hunsencambodia/videos/458166008589322/