អន្ដរជាតិ៖ យោងតាមការចេញផ្សាយដោយសារព័ត៌មាន AFP នៅរសៀលថ្ងៃអង្គារ ទី០៨ ខែមិថុនា ឆ្នាំ២០២១ បានឲ្យដឹងថា រថភ្លើងដឹកអ្នកដំណើរល្បឿនលឿនមួយខ្សែ បានបុករថភ្លើងអ្នកដំណើរមួយខ្សែផ្សេងទៀត ដែលក្រឡាច់ចេញពីផ្លូវរបស់ខ្លួន នៅក្បែរទីក្រុង ដាហាគី (Daharki) ក្នុងខេត្ត ស៊ីនដ៍ (Sindh) របស់ប៉ាគីស្ថាន បានធ្វើឲ្យតួលេខអ្នកស្លាប់កើនដល់ ៦៣នាក់។

ក្រុមសង្រ្គោះនៅប្រទេសប៉ាគីស្ថាន នាថ្ងៃអង្គារនេះ បានបន្តធ្វើការរុករកនៅកន្លែងរថភ្លើងពីរខ្សែបុកគ្នា កាលពីថ្ងៃចន្ទម្សិលមិញ ខណៈតួលេខអ្នកស្លាប់កើនដល់ ៦៣នាក់។ ក្រោយគ្រោះថ្នាក់ដ៏រន្ធត់មួយបានកើតឡើង នៅពេលដែលរថភ្លើងដឹកអ្នកដំណើរល្បឿនលឿនមួយខ្សែ បានបុករថភ្លើងអ្នកដំណើរមួយខ្សែផ្សេងទៀត ដែលក្រឡាច់ចេញពីផ្លូវរបស់ខ្លួន នៅក្បែរទីក្រុង ដាហាគី (Daharki) ក្នុងខេត្ត ស៊ីនដ៍ (Sindh) របស់ប៉ាគីស្ថាន។

គួរបញ្ជាក់ថា រថភ្លើងរបស់ក្រុមហ៊ុន មីលឡេត អិចប្រែស (Millat Express) ដែលមានគោលដៅធ្វើដំណើរពីទីក្រុង ការ៉ាជី (Karachi) ឆ្ពោះទៅកាន់ទីក្រុង សាហ្គោដា (Sargodha) បានក្រឡាច់ចេញពីផ្លូវ ហើយកំណាត់ទូរបស់វា បានខ្ទាតរាយប៉ាយទៅលើផ្លូវជាប់នោះ។ ប៉ុន្មាននាទីក្រោយមក រថភ្លើងរបស់ក្រុមហ៊ុន សាយីដ អិចប្រែស (Syed Express) ដែលមកពីទីក្រុង រ៉ាវ៉ាល់ភីនឌី (Rawalpindi) ក៏បានមកដល់កន្លែងកើតហេតុ ក្នុងទិសដៅផ្ទុយគ្នា ហើយបុកកំណាត់ទូររថភ្លើងទាំងនោះពេញទំហឹង៕