អន្ដរជាតិ៖ យោងតាមការចេញផ្សាយដោយសារព័ត៌មាន CNA នាព្រឹកថ្ងៃអង្គារ ទី១៨ ខែឧសភា ឆ្នាំ២០២១ បានឲ្យដឹងថាមន្ត្រីតំណាងជាន់ខ្ពស់នៃកោះតៃវ៉ាន់ ប្រចាំនៅរដ្ឋធានីវ៉ាស៊ីនតោនបានលើកឡើងថា តៃវ៉ាន់កំពុងតែពិភាក្សាជាមួយសហរដ្ឋអាមេរិក សម្រាប់ការចែករំលែកវ៉ាក់សាំងបង្ការកូវីដ១៩ ដែលលោកប្រធានាធិបតី ចូ បៃដិន កំពុងមានផែនការក្នុងការបរិច្ចាគទៅកាន់ពិភពលោក។

ជុំវិញដំណឹងខាងលើនេះ លោកស្រី Hsiao Bi-khim មន្ត្រីតំណាងជាន់ខ្ពស់នៃកោះតៃវ៉ាន់ប្រចាំសហរដ្ឋអាមេរិកបានលើកឡើងថា «យើងចង់ចរចា ជាមួយសហរដ្ឋអាមេរិក ដើម្បីទទួលបានវ៉ាក់សាំងបង្ការកូវីដ១៩ ។ យើងបានប្រាប់សហរដ្ឋអាមេរិករួចហើយថា យើងចង់មានឈ្មោះក្នុងបញ្ជី អ្នកត្រូវទទួលបានវ៉ាក់សាំង នោះដែរ»។

ការលើកឡើងរបស់លោកស្រី Hsiao Bi-khim គឺក្រោយពេលដែល ប្រធានាធិបតីអាមេរិក លោក ចូ បៃដិន បានប្រកាសថា សហរដ្ឋអាមេរិកនឹងបញ្ជូនវ៉ាក់សាំងបង្ការកូវីដ១៩ ផលិតក្នុងស្រុកសរុប ២០លានដូសទៅបរទេស នៅត្រឹមដំណាច់ខែមិថុនាខាងមុខ ហើយវានឹងក្លាយជាលើកដំបូង ដែលសហរដ្ឋអាមេរិកធ្វើយ៉ាងដូច្នេះ គិតចាប់តាំងពីខ្លួនបានអនុម័តឲ្យប្រើប្រាស់ ជាផ្លូវការនូវវ៉ាក់សាំងទាំងនោះ។

គួរបញ្ជាក់ថា លោក ចូ បៃដិន បានប្រកាសក្នុងថ្ងៃចន្ទថា វ៉ាក់សាំងផលិតក្នុងស្រុកចំនួន ២០លានដូស ដែលនឹងត្រូវបញ្ចេញទៅបរទេសជាលើកដំបូងនេះ គឺរួមមាន Pfizer-BioNTech, Moderna និង Johnson & Johnson ដោយវាជាការបូកបន្ថែមពីលើវ៉ាក់សាំងអង់គ្លេស AstraZeneca ចំនួន ៦០លានដូស ដែលសហរដ្ឋអាមេរិកមានផែនការបរិច្ចាគទៅកាន់អន្តរជាតិ៕