តាកែវ៖ មន្ដ្រីនគរបាលម្នាក់ត្រូវបានរកឃើញថា វិជ្ជមានជំងឺកូវីដ១៩។នេះបើតាមរបាយការណ៍របស់រដ្ឋបាលក្រុងដូនកែវ ផ្ញើជូនអភិបាលខេត្តតាកែវនៅរសៀលថ្ងៃទី០៦ ខែឧសភា ឆ្នាំ២០២១។

យោងតាមសេចក្តីជូនរបស់រដ្ឋបាលក្រុងដូនកែវបានឱ្យដឹងថា មន្ដ្រីនគរបាលម្នាក់ ដែលត្រូវបានរកឃើញថា វិជ្ជមានជំងឺកូវីដ១៩នោះឈ្មោះ យិន សេរី រស់នៅភូមិតាំង សង្កាត់រកាក្រៅ ក្រុងដូនកែវ ខេត្តតាកែវ បម្រើការងារនៅនាយកដ្ឋាននគរបាលការពារ។ រូបគាត់ទៅយកសំណាករួចនៅរាជធានីភ្នំពេញ ហើយកាលពីថ្ងៃទី០៣ ខែឧសភា ឆ្នាំ២០២១បានធ្វើដំណើរមកស្រុកកំណើតខ្លួន លុះមកដល់ផ្ទះបានប្រាប់ក្រុមគ្រួសារមិនឲ្យមកជិតខ្លួន រួចបានទៅធ្វើចត្តាឡីស័កនៅមណ្ឌលសាលាបឋមសិក្សាត្រាំតែម្ដង។ ក្រោយមកនៅថ្ងៃទី០៥ ខែឧសភា ឆ្នាំ២០២១ រូបគាត់ក៏បានទទួលព័ត៌មានពីភ្នំពេញថា វិជ្ជមានជំងឺកូវីដ១៩។

សូមបញ្ជាក់ថា សម្រាប់ករណីនេះ គាត់មិនមានអ្នកប៉ះពាល់ផ្ទាល់ និងដោយប្រយោលនោះទេ។ បច្ចុប្បន្នគាត់ត្រូវបានក្រុមគ្រូពេទ្យដឹកមកសម្រាកព្យាបាលនៅមន្ទីរពេទ្យបង្អែកខេត្តតាកែវ៕